POSSIACUM

POSSIACUM

vulgo Poissi, Latine Pisciacum; urbs Insulae Galliae, celebris natalibus S. Ludovici, Monasteriô Monialium, ex illustrissimis Galliae familiis, et Colloquio de Religione, inter Cardinalem Lotharingum et Theodorum Bezam, Theologum Genevens. instituto, A. C. 1561. Cuius historia sic paucis habet. Coram Carolo IX. Rege, matre eius Catharina, Principibus sanguinis, Episcopis, Cardinalibus, Consiliariis status, Proceribusque plurimis utriusque religionis, ut et Theologis Reformatis, inter quos Theodor. Beza, Augustin. Marloratus, Ioh. Malo et Ioh. Spina, Petrus Martyr, Ioh. Viretus, Franciscus Morellus, etc. E quibus praecipue Beza et Martyr partes sustinuêre: Hospitalius Cancellarius oratione primum habitâ, de utilitate et necessitate Colloquii disseruit. Tum Beza, postquam calumniam Cardinalis, Lotharingi Oecolampadio impactam diluisset, flexis genibus Confessionem Fidei augustissimam fusâ oratione edidit, Ecclesiâ ab Anabaptistis et Libertnis vindicatâ. Dein Transubstantiationem cum Consubstantiatione refutavit, Confessionemque scriptô comprehensam Regi obtulit: In disputationis aestu cum dixisset, licet omnes fideles in S. Cenae participent corpori et Sanguini CHRISTI, tamen si ad spatium loci respiciatur, Corpus Christi tantum abesse a pane et vino quantum caelum a terra: cum indignatione adversariorum auditus est, poscente Card. Turnoniô, ut Colloquium, cui impar erat, abrumperetur. Post aliquot dies admissis rursus Protestantibus, Beza Lotharingo respondit, ac de Ecclesia, notisque eius disseruit. Porro disputatum de Cena Domini et Vocatione Ministrorum. Hîc cum Lotharingo non succederet, Ecclesias Gallicas et Germanicas commissurus, suasit, ut Augustanae Confessioni Reformati subscriberent: Interrogatus, an idem facere paratus esset, tacuit. Tandem Cardinalis Ferrar. Nuntius Pontinfic. cum Iac. Layneo, Hispan. Generali Iesuitarum adveniens, acriter increpitâ Reginâ, quod in colloquium consensisset, imperiosum Collationi finem imposuit. Coeterum vide Pisciacum.